Bitha paalki,door gagan se khud lakshmi usko laayin thi,
paak,saaf paatey par Aus si.. abhi apni jananni mein samayi thi,
tere janamon ke punayon ka, saar bann,uphaar bann,wo pariyon ne bhijwayi thi,
tere dukh ke baadal chchantney,roshni ki parat bann,putri bann,
Wo tere dwarey aayi thi,wo tere dwarey aayi thi..

Mohan ki muskaan se thi wo zyaada pyari,
Murlidhar ki murli se awaaz guzari,
Shyam rang si aankhen uski kaari-kaari,
Brijlal ki holi ke har dhang,har rang par thi wo bhari,
krishna ko arpan kiye the jo,
wo us sakha,us sudamaa ke chaawal ki garayi thi,
wo tere dwarey aayi thi,wo tere dwarey aayi thi..

Par,par,par jo thi madhav ke mukut ka mor pankh,
usko maana tune mahabharat ka yudh shankh,
jaana jab tere ghar aayegi kanya,
budhdhi hui bhrashta, paap hua jhaghanya.
Darr,shankaa,bhaya,ghabraahat ne ghera aur tu seham gaya,
samaj kahega kuldeepak nahi tere,rag-rag mein paurash ka tere yeh Aham gaya,
Uchchalegi pagadi,jhukwayegi sarr,dimag se nikla dil tak tere waham gaya,
naa lene dunga isey janam,yeh soch pyar,daya aur mann se tere reham gaya.
Kuchal diya usko ugne se, khilne se pehle, jo sang baharein laayi thi,
wo tere dwarey aayi thi,Wo tere dwarey aayi thi.

Dekh kroorta manav teri,Dil gaya dehal,
shamshaan di usko jisko tha dena sasuraal mahal,
Wo Maa chchilaayi,gidgidaayi,jis ne beti ke liye sapno sang bunaa unn,
jisne khoon se sinchaa,usii ki kokh mein kar diya khoon,
uske bhi the sapne,wo bhi uddti,phirti jaisey gagan mein paakhi,
Oo Murakh,Oo nirlaj kya naa dekhi tune Aurat ke avataar ki jhaanki,
Jo naa hoti Maa,na hota tu,Naa hoti behen to kisse bandhvata yeh jo dorr hai rakhi,
Par tune to aisi hi kisi dorr se,ek chchor se,uski laash hai taanki.
Tu tha jiska rakshak,wo tere hi dwara gayi dafnaayi thi,
Wo tere dwaarey aayi thi,
Wo tere hi dwaraa gayi dafnaayi thi,
Wo tere dwaarey aayi thi,Wo tere dwaarey aayi thi.

BY: SHLABH JAIN